بسم الله الرحمن الرحيم
( ليلة العيد )
بين الماضي والحاضر
مسرحية اجتماعية نسائية أعدها / علي بن سعد الزهراني ضمن فعاليات القسم النسوي لمهرجان الاطاولة التراثي الخامس عام 1440هـ
ملاحظة / المسرحية كتبت باللهجة المحلية الدارجة ، ولم أخضعها لقواعد الاملاء ، فالتنوين أكتبه نونا وهكذا وذلك لتصل الكلمة كما هي ، وكأن القارئ يسمعها من فم المتحدثة مباشرة .
المشهد
( مجموعة فتيات صغيرات يقمن بكنس وتنظيف البيت )
نورة/ ( تغني) العيد بكرة والحناني عشيا
جمعة / ( ترد عليها ) وياعيد ياعواد عود علينا نذبح لك الخرفان حقن علينا
نورة/ هذي في عيد النحر يالمغزولة وش معك
جمعة / كلها عيدن الفطر والا النحر وش فرقت
نورة ( تقترب منها ، وتشير اليها ) النحور في عيد النحر يالدنجا
جمعة / وحتى في الفطر يذبحون الخرفان شركة للعيد ،
نوره ( متذمرة وتنظر لاختها بطفش ) اقول ما ينقدر فيك ، وما اكثر غلبتك . شركة العيد ماقد ذبحوا فيها خرفان مايذبحون الا ثور قحم ماعد يعمل
الام / ( تدخل البيت ) سلام ، يالله اعطهن العافية ، لاغلقتن اندرن الزربه نظفنها ترى بنات عمكن صالح وعمكن محمد وغيرهنه كملنه ، وزرابهم تنسرط من النظافة ( تدخل داخل البيت )
صندلة / ( تدخل ) يازين الزراب زيناه ، وين اميه ، تراني قهرت وما عد ورايه قطرة ، جبت حملة الحمارة شناعن عشان نقني به خبزة العيد وزدت استقيت من بير زبيدة مرتين مرة بالزفة فوق الحمارة ومرة بالقربة فوق ظهريه
الام / ( تخرج ) ، هاه جيتي ، الله يسعدك ، هي عدي وسوي لبوك واخوتك مخووض والا مشرق بيجون ذلحين يدورن العيشة من صبحا ما ذاقوا شي
نورة / وانحن مالنا رب ! ، اربنا كلنا شي ! حتى انحن ما ارتحنا من صباح رب العالمين نكنس ونطوي الفرش ونغسل الضيع وننشر الثياب ونرعى الغنم ،، والورعان مهلا يتمشون ويلعبون كورة ولا عودوا البيت يتحكمون
جمعة / لا وامتحنونا بمشعالهم مهلا يبنونه ويهدونه من قل الشاينه
غالية / ( تضحك ) ومعهم كفرة يدربونها واذا قربوا من راس الجبل تدهربت عليهم
الام / هيه عفن الهروج الخاوية ، وواحده منكن تسوي لقمة قرص ذلحين بيجون يدورون عيشة
جمعة / لا تخافين عليهم قبل ما يسرحون مروا على جالوق التمر وكل واحد خذله لبزة والله انها الخير
الام / وين الرادي خلونا نسمع فيه العيد ،
نورة / خلاص باحت ام حديجان وش تبغين تسمعين ، وحتى سعيد في شهر الصوم خلص ، بكرة العيد وهم مايجون الا حد رمضان
الام / ( بهدوء وكانها تسر بالكلام ) وان الرادي حلاه نسمع فيه كل شي ، ( ترفع صوتها قليلا ) لكن الله يعيدنا رضاه ورحمة سماه ، لاغلقتن تحنينه وتجعوينه في فرشكنه وارقدنه معنا ضيعة كثيرة من قبل الفجر ، نشب القبس ونطرح الخبزة ونقني عليها ، نطبخ مرقتنا ونحمي سمننا ، وواحدة منكن تتفقد عمتها ان كان معها ضيعة تحاوشها ، بناتها صغار
نورة / ( بفرح ) انا يمه باروح اساعدها
جمعه / لا والله مايروح الا انا ، انتي تحطبتي واستقيتي لها ، تحسدني اكنس بيتها ، والله ما تتلعين .
(( اظلام ))
صوت .... وبعد عقود من الزمن اصبحت نورة وجمعة وصندلة جدات
المشهد
صباح العيد
الام / ( تنادي بناتها ) سمر ، منار هيا اظهرت علبكن ، قمن قوام ، بنروح نصلي العيد ، ( تحدث نفسها ) الله يسقي زمان امهاتيه نورة وجمعة وصندلة ، ماكن يقدرن يصليي العيد مع الناس ، اللي مشغوله في خبزة العيد واللي تكنس واللي تطبخ ، واللي تضحي الحلال ،
( تخرج واحدة من البنات ، وهي تتمغط ، كسل ونوم )
سمر / ماصارت كل يوم وانتي تتذكزين ايام زمان وكننا مانعرف نعيش زيكم
الام / اي والله ماتعرفون ، احمدن ربكن على النعمة ، لو تعيشون يوم واحد من ايامنا كان عرفتم
لمار / (تخرج وهي تتمغط ) يالله صباح خير ، واحنا كمان نتعب ، البارح ما رجعنا الا اخر الليل ماخلينا ولا مول وانحن نهلق ، تكسرت ارجولنا ندور فساتين وليتنا لقينا
سمر / اي والله تعبنا مرة ، ماعاد نلقى على مزاجنا
الام / هم ان العيب انتنه ً بنات خلق الله من اول الشهر ياخذن طلبهنه وانتنه تخلونه الين ليلة العيد ، يوم طارت الطير بارزاقها قمتن تدورنه ، يالله قوام تجهزنه ذلحين ابوكم بيدعينا وننزل معه
دلال / ( من الداخل ) وقفوا لي ، تحروني لا تروحون وتخلوني
الام ،/ قوام ، راح الوقت
دلال / ( تخرج عليهم ) يالله انا جاهزة مشينا .
الام / ( تستغرب لبس دلال ) وش ذالفستان معك ياخيبتك خيبتاه والله لا يشوفه ابوك ليذبحك ، حطيه قوام
دلال / والله مالقيت احسن منه ، كان ودي اشتري اقصر منه ومكشوف الظهر والصدر كلها بس والله مالقيت الا هذا مو حلو
الام / يوه يوه يوه ، يالله لا فضحتنا ، والله تغير الزمان ، كان مايطلع منا شعرة لا في العيد ولا في غيره ، لكن والله ماتتابعينا بذي الفستان ، تبغين ابوك يذبحنيه
سمر / طيب وش فيها يمه فستان حلو موديله حلو وطالع عليها يهبل
الام / يهبل اي والله يهبل ، وين عايشات انتنه ، اقعدي هنيه والله ماتتابعيننا
دلال / ( تبكي ) والله لاروح معكم ،
لمار / يمه خليها تروح والله فستانها حلو واحسن من فساتين بنات عمي وبنات خالي
الام / خلاص قلتها والله ما تتابعنا
( يخرجن ، ترجع الام وتتخدث مع دلال )
جهزي المعلبات والنواشف وقطعي التميس اللي جابه ابوك امس لين نجي ، وبيجون اعمامك وورعانهم يتعايدون معنا
دلال / ياربي لك الحمد ، معلبات ونواشف ، خلاص طفشنا من هذا الاكل
الام / وش ودك نسوي يافرختيه ، خبزة ؟ مرقة ؟ سمن وخلاصة ؟ خلاص باحت والا يازين زمانها .
دلال / ( تصر وجهها ) ياي خبزه ؟ مرقه ؟ مافيه عندكم غير هذي الحاجات ؟
الام / الا والله عندنا ، ماقلت لك جهزيها لين نجي
دلال / المعلبات والنواشف ، الله يصبرنا عليها ،
( يدخلن البنات يستعجلن امهن )
سمر / يالله تاخرنا ،
لمار / يالله ابيه في السيارة
دلال / ( تخرج فشفاش ) اما انا فهذا عيدي ما ابغي عيشتكم
( البنات يهجمن على اختهن ويحاولن اخذ الفشفاش عليها )
الام / ( تنظر لهن وتضرب كفا على كف ) حسبنا الله ونعم الوكيل ، ياحياة الضعفة ، بالله تيه عيشة ، تغير الزمان واهله ، والله يستر من المستقبل مدري وش بياكلون ورعانكم
دلال / والله شوفي يمه زمان عيد الجدات خبزة مقناه بالقشاش وزمانكم نواشف تجيب العماش وزماننا كله اندومي وفشفاش واولادنا زمانهم اكيد ماش في ماش
الام / ( تضحك ) والله انكم من ذلحين ماش في ماش ، والله لبعد تتمنون القراش والمشاش ولحمة الحسلان و الكباش ، هيا مشينا لايجي ابوكن يضربنا لين نلطى في الفراش .
يخرجن من المسرح
( نهاية )
ليست هناك تعليقات
إرسال تعليق